Azərbaycan, Gəncə / Trend müxbir V.Məmmədov/ Gəncə və Şəki şəhərlərində su və kanalizasiya sistemlərinin yenidən qurulması layihəsi çərçivəsində yerli mütəxəssislər üçün seminar-treninqlərin keçirilməsinə başlanılıb. Almaniya və İsveçrə mütəxəssislərinin keçirdiyi seminar-treninqdə 36 nəfər iştirak edir. Təlimlər 3 turdan ibarətdir. İlk tur keçirilib və növbəti tur aprelin 23-də keçiriləcək. İkinci turda 12 mütəxəssis seçiləcək. Sonuncu tur Gürcüstanda təşkil olunacaq və son turda 8 nəfər seçiləcək. Həmin mütəxəssislər isə alman texnologiyası ilə tanış olmaq üçün Almaniyaya göndəriləcək.
Gəncə və Şəkinin su və kanalizasiya xətlərinin yenidən qurulması layihəsinə 54,9 mln. avro ayrılıb. Bu vəsaitin 27 mln. avrosu Almaniya, 4 mln. avrosu İsveçrə, qalan hissəsi isə Azərbaycan Beynəlxalq Bankı tərəfindən ödəniləcək. Ümumi vəsaitdən 36 mln. avro Gəncənin su və kanalizasiya xəttinin yenidən qurulmasına ayrılıb.
