Azərbaycan, Naxçıvan/ Trend müxbir C.Qurbanoğlu/ Naxçıvanda "Kənd təsərrüfatının İnkişafı və kreditləşməsi layihəsi" çərçivəsində 170 torpaq mükiyyətçisinə ümumi dəyəri 90 min manat olan kredit verilib. Naxçıvan Aqro-Biznes MMC-nin direktoru Xəlil Əliyev bildirib ki, kreditlərin verilməsi regionda kartofçuluğun daha sürətli inkişafına nail olmaq məqsədi daşıyır. Kreditlər bir il müddətinə 25%-lə verilir: "İlk mərhələdə vətəndaşlara 300 manat verilir. Əgər vəsaitdən lazımınca istifadə edilib, vaxtında qaytarılarsa, verilən kreditin həcmi sahibkarın istəyinə uyğun artırıla bilər".
Kredit kampaniyasının Muxtar Respublikanın bütün bölgələrini əhatə etdiyini deyən müsahib Şərur və Ordubad rayonlarında kartofçuluğa daha çox maraq olduğunu, kreditlərin verilmə həcminə görə bu rayonların mülkiyyətçilərinin fərqləndiyini bildirib.
Kartofçuluğun inkişafına görə, sonuncu dəfə yanvar ayında 72 nəfərə 52 min manat dəyərində toxum alınması üçün kreditlər verilib. Növbəti belə kreditlərin martın sonlarında verilməsi nəzərdə tutulub.