Azərbaycan, Bakı/ Trend müxbir S.Əliyev/ Aprel ayının 23-27-də Tiflisdə keçiriləcək Dəmir Yollarının Birliyi Təşkilatının (DYBT) baş direktorlarının XXII iclasında 2008-ci il və növbəti illər üçün iş planı müzakirə mövzusu olacaq. Bu barədə Azərbaycanın Dəmir Yolu İdarəsindən məlumat veriblər.
Görüşdə Azərbaycan Dövlət Dəmir Yolu İdarəsindən nümayəndə heyəti iştirak edəcək. Toplantıda həmçinin DYBT-nin yüklərin, sərnişinlərin daşınması, infrastruktur və hərəkət qatarları üzrə komissiyalarının 2006-cı ildəki fəaliyyəti müzakirə olunacaq. Ötən ildə DYBT-nin kotirovka, maliyyələşdirmə və hesabat, sənədləşmənin müasirləşdirilməsi üzrə daimi və müvəqqəti işçi qruplarının fəaliyyətlərinin yekunları müzakirə olunacaq.
Həmçinin növbəti iclasın vaxtı və yeri müəyyənləşdiriləcək.
DYBT 28 iyun 1956-cı ildə Sofiyada (Bolqarıstan) dəmiryol nəqliyyatına rəhbərlik edən nazirlərin toplantısında yaradılan beynəlxalq təşkilatdır. DYBT-nin üzvləri Azərbaycan, Albaniya, Belarus, Bolqarıstan, Macarıstan, Vyetnam, Gürcüstan, İran, Qazaxıstan, Çin, Koreya, Kuba, Qırğızıstan, Latviya, Litva, Moldova, Monqolustan, Polşa, Rusiya, Rumıniya, Slovakiya, Tacikistan, Türkmənistan, Özbəkistan, Ukrayna, Çexiya , Estoniyadır.
