Azərbaycan, Bakı/ Trend müxir S.Əliyev/ Azərbaycan 2007-ci il naviqasiya dövründə Volqa-Don kanalından keçmək üçün 20 gəminin yer aldığı siyahını Rusiya tərəfinə təqdim edib. Yaxın zamanda Rusiya hökumət başçısının sərəncamı üzrə icazə veriləcəyi gözlənilir. Bu barədə Azərbaycan Dövlət Xəzər Gəmiçiliyinin Xarici iqtisadi əlaqələr və marketinq üzrə rəis müavini Muxtar Axundov bildirib.
Rusiyanın öz daxili sularında hərəkətlə bağlı icazəni bu ayın sonuna qədər verəcəyi gözlənilir. Naviqasiya isə martın 31-də başlayıb.
Hazırda Rusiyanın daxili sularında Azərbaycan gəmilərinin hərəkəti ilə bağlı icazə məsələsi dəyişilməz olaraq qalır. Belə ki, bir gəmi Xəzər dənizinə gəlib daha sonra daimi iş yeri olan Qara dənizə yalnız bir dəfə qayıda bilər. Bu məsələnin həlli üçün Rusiyanın normativ-hüquqi aktlarında dəyişiklik etmək lazımdır.
2006-cı ildə Gəmiçilik Rusiya hökumətindən 14 gəmiyə Rusiyanın daxili sularında hərəkət üçün 25 icazə alıb. 11 icazə Xəzərə giriş, 14 icazə isə Xəzərdən çıxış üçün alınıb.
İcazə alınmasına baxmayaraq Azərbaycan Rusiyanın daxili sularından keçidlə bağlı uzunmüddətli sazişin imzalanacağına ümid edir. Bunun üçün Rusiyanın Dəniz Məcəlləsində dəyişiklik etmək lazımdır.
Hazırda Azərbaycan gəmilərinin Rusiyanın daxili sularına keçidi 20-25 min dollara başa gəldiyi halda, rus gəmiləri üçün bu qiymət 5-6 min dollar təşkil edir. Belə olduqda Azərbaycan gəmilərinin hərəkəti Rusiyanın kanal xidmətlərinə böyük gəlir verir.
