Azərbaycan, Bakı /müx. Trend İ.Xəlilova / May ayında Lənkəranda regional inkişafla bağlı konfrans keçiriləcək. Bu konfransda sahibkarlar dövlət strukturlarının nümayəndələri ilə birgə aktual problemlərin həlli üzərində işləyəcəklər. Bu barədə Almaniya Texniki Əməkdaşlıq Cəmiyyətinin (GTZ) Azərbaycanda özəl sektorun dəstəklənməsi proqramının meneceri Mixael Gerlix məlumat verib. Sözügedən konfrans da məhz GTZ proqramı çərçivəsində reallaşdırılacaq.
Gerlixin sözlərinə görə, adətən kənd yerlərində iş adamlarının vacib informasiyaya çıxışı olmur. Bu problemin həlli üçün GTZ proqramı İqtisadi İnkişaf Nazirliyi ilə birlikdə Lənkəranda iqtisadi mərkəz açıb. Bu, bölgənin iş adamlarına marketinq və maliyyə treninqlərində iştirak etmək, habelə regional yarmarkalarda öz müəssisələrini təqdim etmək imkanı verir.
GTZ proqramı cənub bölgəsində yeni direktivlər konsepsiyasını dəstəkləyir və çayyetişdirmə, turizm kimi sahələrə ekspertləri cəlb edir. "Lənkəranın İcra Hakimiyyəti ilə bəzi xidmət sahələrində əməkdaşlıq üzrə anlaşma əldə etdik. Məsələn, personalın peşəkarlıq səviyyəsinin artırılması ilə bağlı razılığa gəldik. Buraya qastronomiya, treninqlərin keçirilməsi kimi məsələlər daxildir" - deyə Gerlix bildirib.
Menecerin sözlərinə görə, proqram çərçivəsində həmçinin Azərbaycan şirkətlərinə məhsulların xarici bazarlara çıxarılması üçün yardımın göstəriləcəyi nəzərdə tutulur. "Çünki bu gün bir çox şirkətlər öz məhsulunu satmaq qabiliyyətinə malik deyil" - deyə o qeyd edib.
İlkin olaraq GTZ buraxılan məhsulun keyfiyyətinin artırılması məqsədilə texniki yardım göstərir, sonra isə ya bu məhsulun rellaşdırılması üçün sərgilərdə xarici tərəfdaşlar tapır, ya da konkret alıcılar dəvət edir.