Azərbaycan, Bakı /müx. Trend İ.Xəlilova / "Azərbaycan İnvestisiya Şirkəti" yaxın həftələrdə Azərbaycanda insulin istehsal edən zavodu tikməkdə maraqlı olan şirkətdən konkret təkliflər gözləyir. Bu barədə "Azərbaycan İnvestisiya Şirkəti"nin icraçı direktoru Anar Axundov məlumat verib. Lakin Axundov sözügedən şirkətin adını açıqlamaq istəməyib. Təkcə o bəllidir ki, bu şirkət hazırda layihənin biznes-planı üzərində çalışmalar aparır.
İlkin olaraq "Azərbaycan İnvestisiya Şirkəti" Danimarkanın tanınmış şirkəti "Novo-Nordisk"lə danışıqlar aparıb. Vaxtı itirməmək üçün "Azərbaycan İnvestisiya Şirkəti" digərləri ilə də təmaslar qurub.
"Azərbaycan İnvestisiya Şirkəti" investorlar qarşısında iki əsas şərt irəli sürür. Söhbət ixraca yönəlik insulin zavodunun inşasından gedir. Şərtlərin biri yeni şirkəti regional xarakterli etməkdir, digər şərt isə dünyada ən keyfiyyətli insulin istehsalına nail olmaqdır. "Dünyada iki texnologiya mövcuddur. Ən müasir texnologiyaların tətbiq ediləcəyi təqdirdə, insulin zavoduna yatırımlar etməyə hazırıq" - deyə Axundov bildirib.
"Azərbaycan İnvestisiya Şirkəti" iştirak payının 25 faizini almağa hazır olduğu üçün layihəyə cəlb edilən şirkət əsas səhmdar rolunda çıxış edəcək.
Son zamanlar respublikada insulina tələbət artdığı üçün bu preparatın çatışmazlığı ilə bağlı məsələnin dövlət səviyyəsində həllinin zərurəti yaranıb. Layihənin reallaşdırılması yüksək keyfiyyətli insulinin istehsalı hesabına bu dərmana olan tələbatı ödəyəcək, habelə onun ixracı üçün imkan yaradacaq.
Layihə təxminən 12 mln. dollar həcmində dəyərləndirilir.
