Azərbaycan,Bakı/müxbir Trend Ü.İsmayılova/Azərbaycanın sığorta bazarı ilə tanışlıq üçün Bakıda olmuş kanadalı aktuari Jan Noel Martineu ölkənin sığorta bazarının vəziyyətinə dair hesabat hazırlayır. Bu barədə cümə axşamı Maliyyə Nazirliyinin Dövlət Sığorta Nəzarəti şöbəsinin rəhbəri Namiq Xəlilov məlumat verib.
Xəlilovun sözlərinə görə, Martineunun hesabatı bir neçə həftədən sonra hazır olacaq, bundan sonra aktuari bir daha Bakıya gələcək və Dövlət Nəzarəti şöbəsi ilə birgə ölkənin sığorta bazarının inkişafı üzrə plan hazırlayacaq. Plana həmçinin aktuari işin inkişafı sahəsində birgə iş də daxil olacaq.
Xəlilov qeyd edib ki, aktuarinin Azərbaycana dəvət olunmasının məqsədi Azərbaycanda aktuarilər məktəbi və bu sahədə mütəxəssislərin yaradılmasıdır.
Layihəyə maliyyə yardımını ACDI/VOCA göstərəcək.
ACDI/VOCA ABŞ-ın geniş miqyaslı iqtisadi artıma və inkişaf etməkdə olan ölkələrdə vətəndaş cəmiyyətinin möhkəmləndirilməsinə yardım edən özəl qeyri-kommersiya şirkətidir.
