Azərbaycan, Bakı /müx. Trend S.Babayeva/ Ötən həftə İsveçrənin Mettler Toledo şirkətinin MDB üzrə direktor müavini İvan Raxov Bakıya səfər edib. O, bura Azərbaycanın Standartlaşma, metrologiya və patent üzrə Dövlət Agentliyinin dəvəti ilə gəlib.
Transmilli şirkət olan Mettler Toledo dünyada laborator, sənaye və ticarət çəkiölçən avadanlıqlarının istehsalçısıdır. Eyni zamanda şirkət laboratoriya və sənaye üçün analitik vasitələrin istehsalı sahəsində lider mövqelərdədir.
Qiymətləndirmələrə görə, Mettler Toledo laboratoriya çəkiləri bazarının 40 faizini əhatə edir. Şirkətin mənzil-qərargahı İsveçrənin Qrayfenzee şəhərində, istehsal müəssisələri isə Almaniya, Fransa, Böyük Britaniya, İsveçrə, ABŞ və Çində yerləşir.
Raxovun səfəri çərçivəsində agentliyin müvafiq strukturlarının nümayəndələri, 20-dək müəssisə və təşkilat təmsilçilərinin iştirakı ilə treninq-seminar keçirilib. Əsas məqsəd sıx əməkdaşlığın yaradılması və yerli istehsalçıların şirkətlə tanışlığı olub. Treninq zamanı Mettler Toledo-nun məhsulu təqdim olunub.
