Azərbaycan, Bakı/ Trend müxbir İ.Xəlilova/ Azərbaycan hökuməti Asiya Inkişaf Bankının (AİB) sərt tələbləri ilə əlaqədar olaraq Masallı-Astara yolunun yenidən qurulması üçün kreditdən imtina edə bilər. Bu barədə çərşənbə günü hökumətdən məlumat veriblər. AİB hökumətin üzərinə layihə Direktorlar Şurasında təsdiq olunana qədər Masallı-Astara sahəsindəki torpaq sahələrinin alınması ilə bağlı planı başa çatdırmaq öhdəliyi qoyub. "Həmin rayonların əhalisilə onların köçürülməsi ilə bağlı danışıqlar zaman tələb edir. Müvafiq olaraq planın hazırlanması layihənin təsdiq olunması və həyata keçirilməsini gecikdirir. Buna görə də hökumət bankın tələbləri ilə razılaşmır" - deyə hökumətdən bildiriblər.
Bununla yanaşı, hökumət bu istiqamətdə bankla danışıqları davam etdirəcək. Baş nazirin müavini Abid Şərifovun rəhbərliyi ilə AİB nümayəndələri ilə məsləhətləşmələr növbəti həftə baş tutacaq.
Bu layihənin həyata keçirilməsi üçün Asiya Bankı 200 mln. dollar ayırmağa hazır olduğunu bildirib.
