Azərbaycan, Bakı / Trend müx. İ.Xəlilova / Azərbaycan İqtisadi İnkişaf Nazirliyi bəzi fəaliyyət növlərinə müddətsiz lisenziyaların tətbiqi təşəbbüsündən imtina edib.
Nazirliyin Sahibkarlığın inkişafı siyasəti şöbəsinin müdiri Samir Nuriyev bildirib ki, bu təklif bir sıra dövlət orqanları tərəfindən dəstək tapmayıb və müzakirələr zamanı ümumi rəyə gəlinib ki, müddətsiz lisenziyalaşma müvafiq fəaliyyət növləri üzərində dövlət nəzarətini zəiflədə bilər.
"Biz həmçinin beynəlxalq təcrübəni nəzərdən keçirdik və belə bir təcrübəni aşkarlamadıq. Ona görə də Azərbaycanda olduğu kimi qalmasını düzgün bildik. Yəni hər beş ildən bir lisenziyaları yeniləmək qərarını saxladıq" - deyə Nuriyev vurğulayıb.
Azərbaycan prezidenti İlham Əliyevin 29 dekabr 2006-ci il tarixli sərəncamı ("Xüsusi icazəni (lisenziya) tələb edən kommersiya fəaliyyətinin növləri haqqında") ilə siyahı, rüsumların məbləği və lisenziyaları verən təşkilatlar müəyyənləşdirilib. Siyahıya kommersiya fəaliyyətinin 50 növü daxil edilib. Əvvəllər burada 37 növ, lap öncə isə 204 növ var idi.
Bu il müvafiq siyahıya daha bir fəaliyyət növü əlavə edilib - qızıl məmulatlarının satışı və hazırlanması.
Lisenziyanın alınması üçün dövlət rüsumunun dəyəri fəaliyyət növlərindən asılıdır. Müvafiq məbləğ 220 manatdan 25 min manatadək olur.