Azərbaycan, Bakı / Trend , müxbir İ.Xəlilova/ "Turanbank" Azərbaycanın kənd Təsərrüfatı Nazirliyinin kənd təsərrüfatı kreditləri üzrə dövlət agentliyi ilə büdcə vəsaitləri hesabına kreditlərin verilməsi zamanı agent vəzifələrinin yerinə yetirilməsinə dair müqavilə imzalayıb. Bu haqda məlumatı cümə axşamı bankın idarə heyətinin sədri Nazim Sadığov verib.
Agentlik sentyabr ayından aqrar sahibkarlıqla məşğul olan fiziki və hüquqi şəxslərə güzəştli kreditlərin verilməsinə başlayacaq.
"Turanbank"dan əlavə kənd təsərrüfatı kreditləri üzrə bank-agentlər qismində "Texnikabank", "Rabitəbank", "Muğanbank", "Zaminbank", "Bank of Azerbaijan", "Azərbaycan Sənaye Bankı" və bank olmayan kredit təşkilatı İKA - İcraçı Kredit agentliyi seçilib.
İlkin mərhələdə bu məqsədlə dövlət büdcəsindən 5 mln. manat ayrılıb. Azərbaycan Nazirlər Kabinetinin sərəncamına əsasən kreditlər aşağıdakı istiqamətlərdə istifadə oluna bilər: kənd təsərrüfatı məhsullarının istehsalı və emalı, suvalma torpaqların meliorasiyasının yaxşılaşdırılması, irriqasiya avadanlığı ilə təmin edilmə, kənd təsərrüfatı və kimyəvi maddələrin alınması, Kənd Təsərrüfatı Nazirliyinin pilot layihələri, heyvandarlıqda süni mayalanma.
Agentliyin xətti ilə iki il müddətinə min manat məbləğində mikrokreditlər, 1-20 min manat məbləğində kiçik kreditlər, üç illik müddətə 20-50 min manat dəyərində orta kreditlər, 50-200 min manat dəyərində iri kreditlər veriləcək.