Azərbaycan, Bakı / Trend , müxbir Ü.İsmayılova/ Əmək və Əhalinin Sosial Müdafiəsi Nazirliyinin Əmək Müfəttişliyindən verilən məlumata görə, əmək və əhalinin sosial müdafiəsi naziri Füzuli Ələkbərov çərşənbə günü saat 14:30-da nazirliyin əmək müfətişliyinin əməkdaşları ilə birlikdə təcili iclas keçirəcək.
İclas 16 mərtəbəli binanın uçduğu yerdə aparılan araşdırmalardan sonra görüləcək işlərə həsr olunacaq.
Çərşənbə axşamı saat 17.00 radələrində "Mütəfəkkir" şirkətinin inşa etdirdiyi bina uçub. Şirkətin rəhbəri Əsgər Əliyev Azərbaycanın Cinayət Məcəlləsinin 222-ci maddəsi (tikinti, mədən işlərinin və digər işlərin aparılmasının təhlükəsizlik qaydalarını pozma) ilə həbs olunub.
Hadisə yerindən əldə olunan son məlumatlara görə, binanın uçması nəticəsində yeddi nəfər ölüb.
Yanvar-iyun ayları ərzində Əmək Müfəttişliyi tərəfindən Bakıda aparılan yoxlamalar nəticəsində tikinti işlərinin aparılması zamanı texniki təhlükəsizlik qaydalarının pozulması ilə bağlı 470 qanun pozuntusu qeydə alınıb, onlardan 418-i aradan qaldırılıb.
Bu dövr ərzində tikinti işləri zamanı baş verən bədbəxt hadisə nəticəsində 13 nəfər ölüb.
