Azərbaycan, Bakı / Trend , müxbir S.Əliyev/ Bazar ertəsi hökumətdən verilən məlumata görə, Xəzərin Azərbaycan sektorundakı "İnam" pesrpektitv strukturunda ikinci kəşfiyyat quyusunun qazma işlərinə bu həftənin sonlarına qədər başlana bilər.
Quyunun qazılması məqsədilə "İstiqlal" qurğusu perspektiv strukturda yerləşdiriləcək. Quyunun qazılmasında məqsəd perspektiv strukturda kommersiya cəhətdən səmərəli ehtiyatların axtarışıdır.
Quyunun dərinliyi 5300 metr təşkil edəcək. Qazma işlərinin 2008-ci ilin aprel ayında başa çatacağı planlaşdırılır. Əldə olunan məlumatların qiymətləndirilməsinə və quyunun konservasiyasına 220 gün sərf edilməsi nəzərdə tutulur. Quyu sahildən 40 km aralıda, suyun 186 metr dərinliyində qazılacaq.
Əvvəllər bu strukturda qazma işləri aparılıb, lakin quyudakı yüksək təzyiq üzündən qazma işləri təxirə salınıb.
Koreya Milli Neft Şirkəti (KNOC) oktyabrın 10-da "Shell" ilə Britaniya-Hollandiya şirkətinin "İnam" perspektiv strukturunun kəşfiyyat işlərində və işlənməsində malik olduğu 25% iştirak payının 20%-nin alınmasına dair müqavilə imzalayıb. Beləliklə, "İnam" layihəsində iştirak payı aşağıdakı kimi bölünüb: BP -25%, ARDNŞ - 50%, KNOC - 20%, "Shell" - 5%.
