Azərbaycan, Bakı / Trend / Azərbaycanın Sənaye və Energetika nazirliyindən verilən xəbərə görə, cümə axşamı Macarıstanın İqtisadiyyat və Nəqliyyat Naziri Yanoş Koka Azərbaycana gələcək. Səfər Azərbaycanın Sənaye və Energetika Naziri Natiq Əliyevin dəvəti ilə keçirilir. Görüşün gedişində sənaye və energetika sahələrində əməkdaşlıq məsələləri müzakirə olunacaq. Nazirlə birlikdə Bakıya macar MOL neft-qaz şirkətinin nümayəndələri də gələcəklər. Bu şirkət "Nabukko" qaz kəməri layihəsinin reallaşdırılmasında iştirak edir. "Nabukko" qaz kəməri vasitəsilə qaz Azərbaycan və Mərkəzi Asiya ölkələrindən Aİ ölkələrinə veriləcək. Mərkəzi Asiyadan "Nabukko" -ya qədər qaz , Xəzərin dibi ilə çəkilməsi planlaşdırılan TransXəzər qaz kəməri vasitəsi ilə çatdırıla bilər. O, Xəzərin Qazaxstan və Türkmənistan sahillərindən, qaz ehtiyatları 6 trln. kubmetr ola biləcəyi güman edilən Azərbaycanadək çəkilə bilər. "Nabukko"layihəsinin operatoru kimi, Avstriyanın "OMV" şirkəti çıxış edir və bu layihədə 20% iştirak payına malikdir. Dörd min kilometr uzunluğu olan "Nabukko" qaz kəməri Azərbaycan, Gürcüstan, Türkiyə, Bolqarıstan, Macarıstan, Rumıniya və Avstriya ərazisindən keçməklə, Mərkəzi Asiya və Xəzər dənizi qazının Avropaya daşınmasını təmin edəcək. "Nabukko"nun işlənməsi ilə Avstriyanın OMV, Macarıstanın MOL, Türkiyənin "Botas", Bolqarıstanın "Bulqarqaz" və Rumıniyanın "Transqaz" şirkətləri məşğul olur.
...
