Azərbaycan, Bakı, 14 may/ Trend , müxbir S.Əliyev/ Mayın 16-da Azərbaycan Dövlət Neft Şirkətinin Kulevidəki - Gürcüstanın Qara dəniz sahilindəki yeni terminalının açılışı zamanı mazut partiyası göndəriləcək. Bu barədə çərşənbə günü ARDNŞ-dən məlumat veriblər. Azərbaycan mazutu Petrofarm şirkəti ilə müqavilə çərçivəsində ixrac edir.
ARDNŞ-dən bildiriblər ki, bu gün neft məhsulları üzrə bütün müqavilələr Bakıdan göndərilmə şərtilə bağlanır. "Buna görə də, neft məhsullarının göndərilməsi üçün terminaldan istifadəyə yük sahiblərinin özləri maraq göstərməlidirlər",- Dövlət Neft Şirktinin nümayəndəsi bildirib. Bu terminal vasitəsilə birinci mərhələdə, əsasən, tranzitlə Azərbaycandan keçən neft və neft məhsullarının aşırılacağı gözlənilir.
Terminalın tikintisinin başa çatdırılması üçün ARDNŞ $305 mln. məbləğində sindikatlaşdırılmış kredit götürüb. ABN Amro, Societe Generale və BNP Paribas başda olmaqla, 15 Avropa bankından ibarət sindikat kreditor qismində çıxış edib. ARDNŞ neftə olan yüksək qiymətlər və neft hasilatının artması ilə əlaqədar, borcu 2009-cu ildə tamamilə ödəmək niyyətindədir.
İldə 2 mln. ton neft, 3 mln. ton dizel yanacağı, 4 mln. ton mazut daxil olmaqla, terminalın ümumi aşırma gücü 10 mln. ton təşkil edəcək. Terminalın çən parkının ümumi tutumu 320 min kubmetrdir. Layihə üzrə terminalın aşırma gücünün ildə 15-20 mln. tonadək artırılması nəzərdə tutulub. Çən parkını 380 min kubmetrədək genişləndirmək planlaşdırılır.
Terminal 168 sisternin gətirilməsi mümkün olan dörd dəmir yoluna, yaxınlaşma kanalına və üç körpüyə malikdir. Terminalın strukturuna neft və neft məhsullarının tərkibinin yoxlanılması üzrə laboratoriya, qazın yüklənməsi üçün xüsusi estakadalar, həmçinin, doqquz yardımçı servis gəmisindən ibarət donanma və 13,8 kilometr uzunluğunda yeni "Kolxeti - Kulevi" dəmir yolu daxildir. Hesablamalara görə, terminal 100 min tondan 150 min tonadək dedveytə malik gəmiləri sərbəst qəbul edə bilər.
Müəlliflə əlaqə saxlamaq üçün elektron ünvan: [email protected]
