Azərbaycan, Bakı, 19 may/ Trend , müxbir E.İsmayılov/ Azərbaycan və Gürcüstan ərazisində Bakı-Tbilisi-Ceyhan boru kəmərinin buraxma gücünün genişləndirilməsi üzrə tikinti işlərini sentyabrın 30-dək başa çatdırmaq planlaşdırılır. Bu barədə layihəyə yaxın mənbə məlumat verib. Boru kəmərinin buraxma gücü layihədə nəzərdə tutulan sutkada 1 mln. bareldən 1,2 mln. barelədək artırılacaq.
Hazırda işlər Azərbaycan, Gürcüstan və Türkiyədə nasos stansiyalarında aparılır. Mənbə Türkiyədə boru kəmərinin buraxma gücünün artırılmasına dair işlərin ilin sonunadək başa çatmalı olduğunu bildirib.
Bakı-Tbilisi-Ceyhan neft kəmərinin buraxma gücünün sutkada 1 mln. bareldən 1,2 mln. barelədək artırılması təqribən $69 mln. qiymətləndirilir. Bu vəsaitlər hesabına boru kəmərində inqibatorların (kimyəvi reagentlərin) tətbiqi üçün avadanlıq quraşdırılacaq.
Hazırda boru kəməri ilə sutkada təqribən 800 min barel neft nəql edilir. İlin sonunadək bu göstərici sutkada 1 mln. barelə çatdırılacaq.
2007-ci ilin aprelindən etibarən, Azərbaycanın yüngül neftinin dünya bazarlarına ixracı, əsasən, BTC boru kəməri ilə həyata keçirilir. 2007-ci il ərzində bu neft kəməri üzrə 28 mln. ton neft nəql edilib. BTC üzrə ixracın başlamasından indiyədək onunla 45 mln. tondan çox neft nəql edilib.
BTC neft kəmərinin ümumi uzunluğu 1768 kilometrdir. Bunun 443 km-i Azərbaycan, 249 km-i Gürcüstan, 1076 km- i Türkiyə ərazisindən keçir. Boru kəmərinin tikintisi 2003-cü ilin aprelində, onun neftlə doldurulması isə, 2005-ci il mayın 18-də başlayıb.
BTC -nin tikintisi $4 mlrd.-a başa gəlib. Bu tikinti işləri, boru kəmərinin doldurulmasına olan xərclərdir. Maliyyə xərcləri və bank faizlərinin ödənilməsi bura daxil deyil. Ümumi maliyyə kreditinin məbləği $2,6 mlrd. təşkil edir.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,9 faiz); StatoilHydro (8,71 faiz); TRAO (6,53 faiz); Eni (5 faiz); Total (5 proüentov); Itochu (3,40 faiz); Inpex (2,5 faiz); ConocoPhillips (2,50 faiz) və Hess (2,36 faiz).
Müəlliflə əlaqə ünvanı: [email protected]