Azərbaycan, Bakı, 23 may / Trend , müxbir S.Əliyev/ "Şahdəniz" yatağından qaz hasilatı sutkada 18 mln.-dan 21 mln. kub metrə qədər artıb. Bu barədə cümə günü hökumətdən bildiriblər.
Hazırda "Şahdəniz" qaz kondensat yatağında quraşdırılan TPG-500 (beşinci istismar) platformasından yeni quyunun qazma işləri başa çatmaq üzrədir. Bundan sonra yataqda potensial hasilat sutkada 26-27 mln. kubmetr qaza qədər artacaq.
"Şahdəniz" dəniz yatağının işlənməsinə dair müqavilə 1996-cı il iyunun 4-də imzalanıb. Müqavilənin iştirakçıları: BP (operator) -25,5 faiz, "Statoil Hydro" - 25,5 faiz, NICO - 10 faiz, "Total" - 10 faiz, "LukAgip" - 10 faiz, TPAO- 9 faiz, ARDNŞ- 10 faiz.
Bu yataqda qaz hasilatına 2006-cı ilin dekabrında start verilib. Hazırda qaz Cənubi Qafqaz boru kəməri vasitəsilə Gürcüstan və Türkiyəyə nəql olunur. Azərbaycan da qazın alıcısı qismində çıxış edir.
Yatağın işlənilməsi üzrə birinci mərhələ çərçivəsində ildə 8,8 mlrd. kubmetr qazın hasil ediləcəyi gözlənilir. Əldə ediləcək həcm Azərbaycan, Gürcüstan və Türkiyəyə satılacaq. Reallaşdırılmasına 2012-ci ildə başlanacaq ikinci mərhələ çərçivəsində hasilat 20 mlrd. kubmetrə qədər artırılacaq. Bu mərhələ çərçivəsində qazın Avropa ölkələrinə ixrac edilməsi nəzərdə tutulub.
Məqalə müəllifi ilə əlaqə ünvanı: [email protected]
