Azərbaycan, Bakı, 05 iyun/ Trend Captial , müxbir E.İsmayılov/ 1997-2007-ci illərdə Xəzərin Azərbaycan sektorunda 36 kəşfiyyat quyusunun qazılması hesabına şərti yanacaq ehtiyatı 2,047 mlrd. ton həcmində artıb. Bu barədə Azərbaycan Dövlət Neft Şirkətinin (ARDNŞ) geologiya, geofizika və yataqların işlənilməsi üzrə birinci vitse-prezidenti Xoşbəxt Yusifzadə məlumat verib. Bu quyuların qazılmasına çəkilən ümimi xərclər $1,176 mlrd. təşkil edib.
"Artım göstərici bizim 1986-1990-cı illərdə aldığımız göstəricidən 18 dəfə yüksəkdir", - Yusifzadə bildirib.
Lakin ARDNŞ bu həcmdə dayanmağı planlaşdırmır və dərinsulu "Ümid", "Babək", "Abşeron", "Naxçıvan", "Zəfər-Məşəl", "Qarabağ", "Əşrəfi" və "Dan Ulduzu" sahələrində kəşfiyyat işlərini davam etdirəcək.
ARDNŞ-ın birinci vitse-prezidentinin sözlərinə görə, 2008-2015-ci illərdə bu sahələrdə 19 yeni quyu qazmaq planlaşdırılır. "Ümid", "Babək", "Abşeron" və "Əşrəfi" strukturlarında hər birində üç, "Naxçıvan", "Zəfər-Məşəl", "Qarabağ"da hər birində iki, "Dan Ulduzu"da bir yeni kəşfiyyat quyusu qazılacaq.
"Bu strukturlarda qazma işlərinin ümumi həcmi 110 min metr, çəkilən xərclər isə $2,76 mlrd. təşkil edəcək", - Yusifzadə bildirib.
Müəlliflə əlaqə saxlamaq üçün elektron ünvan: [email protected]