Azərbaycan, Bakı, 25 iyul/ Trend / "Azərenerji" Səhmdar Cəmiyyəti Sumqayıtdakı yeni buxar-qaz qurğusunda birinci enerji blokunu istismara verib. Sumqayıtdakı buxar-qaz qurğusu MDB- də ən iri və müasir buxar- qaz qurğusu olacaq. Bu barədə S C-nin məlumatında bildirilir. 517 MVt gücündə buxar-qaz qurğusu ilin sonunadək tam şəkildə istismara verilməlidir.
"Azərenerji" SC-nin mütəxəssislərinin qiymətləndirmələrinə əsasən, Sumqayıtda tikilən yeni elektrik stansiyasının illik istehsal gücü 3,8 mlrd. kVt/s təşkil edəcək. 517 MVt gücündə bu buxar-qaz qurğusunun yanacağa tələbatı 630 mln. kubmetr qaz olacaq (bir saatlıq 100 min kubmetr). 1 kVt/s elektrik enerjisinin istehsalına çəkilən xərclər 230 qram şərti yanacağa bərabərdir.
Buxar-qaz qurğusunun tikintisi layihəsinin dəyəri 257 mln. avro qiymətləndirilir. Layihənin maliyyələşdirilməsi üzrə müqavilə Bayern LB bank (Almaniya), Societe de General (Fransa) və BNP Paribas (Fransa) arasında imzalanıb. Hər üç bank libor+0,55 kredit dərəcəsi altında 15 il müddətinə (ilk üç il güzəştli) bərabər payda kredit ayırırlar. Bu layihə çərçivəsində, 107 km yüksəkvoltlu elektrik ötürücü xətlərin tikintisi də nəzərdə tutulur. Elektrik stansiyasına qazın verilməsi üçün qaz kəmərinin tikintisi həyata keçirilib. Onun dəyəri 30 mln. avro qiymətləndirilir.
"Azərenerji" SC Sumqayıtda buxar-qaz elektrik stansiyasının tikintisinə dair Almaniyanın Siemens şirkəti ilə müqavilə bağlayıb. Müqavilə Sumqayıt elektrik stansiyası ərzisində 517 MVt gücündə buxar-qaz qurğusunun "açar altında" tikintisini nəzərdə tutur.
