Azərbaycan, Bakı, 30 iyul/ Trend / İyunda "Azərenerji" Səhmdar Cəmiyyətinin idarə etdiyi 41 rayonun şəbəkələrində verilmiş elektrik enerjisinə görə yığılan vəsaitlərin həcmi 82 faiz təşkil edib ki, bu da ötən ilin analoji dövründən 17 faiz çoxdur. Bu barədə SC-nin məlumatında bildirilir. Yığımların 79,4 faizi əhalinin payına düşüb ki, bu da ötən ildən 5,2 faiz çoxdur.
İyun ərzində bu şəbəkələrin abunəçilərinə ümumilikdə 374,2 mln. kVt/s elektrik enerjisi verilib. 2007-ci ilin iyununda bu rəqəm 368,5 mln. kVt/s olub.
Yığımların artması sayğacların quraşdırılması və elektrik enerjisi istehlakının azalması ilə əlaqədardır. "Azərsu" SC istehlak olunmuş elektrik enerjisinin 23,3 faizini, Qaçqın və Məcburi Köçkünlər üzrə Dövlət Komitəsi 68,1 faizini, büdcə təşkilatları isə 97,7 faizini ödəyiblər.
SC-nin məlumatında bildirilir ki, bu orqanlar ödəməni tamamilə həyata keçirsəydilər, "Azərenerji"nin şəbəkələri üzrə verilmiş elektrik enerjisinə görə ümumi vəsait yığımı 93 faiz təşkil edərdi.