Qazaxıstan, Astana, 11 avqust/ Trend , müxbir K.Konırova/ Gürcüstanın Batumi Qara Dəniz limanı Cənubi Osetiyada cərəyan edən hadisələrin gedişində zərər çəkməyib. Bu barədə bu gün "KazMunayQaz"AS MŞ-nin prezidenti Serik Burkitbayev deyib.
"Batumi limanı zərər çəkməyib və ona qarşı heç bir ziyanverici hərəkətə yol verilməyib. Limandakı vəziyyət, xüsusilə də Potidəkindən xeyil fərqlidir", - Astanada jurnalistlərə Burkitbayev bildirib.
Məlum olduğu kimi, "KazMunayQaz" Milli Şirkəti Gürcüstanın Qara Dəniz sahilində yerləşən Batumi limanının səhmlərinin 100%-nə sahibdir.
Şirkət prezidentinin sözlərinə görə, Batumi limanının Qafqazda cərəyan edən hadisələrlə əlaqədar zərər çəkməməsinə baxmayaraq, narahatlıq qalmaqdadır.
"Biz doldurulmaqda olan yük daşıyan gəmiləri və tankerləri çıxartmamışıq. Lakin mənin əvvəlcə qeyd etdiyim kimi, narahatlıq qalmaqdadır", - QMŞ-nin rəhbəri deyib.
Qafqaz istiqamətində yaranmış gərgin vəziyyətlə əlaqədar olaraq, Qazaxıstanın Baş naziri Kərim Məsimov bu gün Astanada keçirilmiş iclasda "KazMunayQaz"a daxili istifadə üçün neft ixracınının səmtinin yenidən müəyyənləşdirilməsi imkanını nəzərdən keçirməyi tapşırıb.
"Gəlin daxili istifadə üçün bu axınların səmtini hələlik dəyişək. Bu məsələni Enegetika Nazirliyi ilə məsləhətləşmək lazımdır", - Baş nazir deyib.
Məsimovun fikrincə, Qafqaz dəhlizindən daxili bazara ildə bir milyon tonadək neft ötürmək olar.
