Azərbaycan, Bakı, 19 avqust/ Trend , müxbir E.İsmayılov/Yanvar-iyulda "Neft Daşları" Neft Qaz-Çıxarma İdarəsi 20 yeni quyunu təhvil verib. 15 quyu artıq vahid xətt sisteminə qoşulub, - çərşənbə axşamı ARDNŞ-nin yaydığı məlumatda deyilir.
Qalan quyular vahid xətt sisteminə yaxın vaxtlarda qoşulacaq.
"Neft Daşları" yatağındakı 1887 saylı platformadan yeni 1898 saylı quyu istismara verilib. Quyu 2650 metr dərinlikdən sutkada 25 ton neft və 37 min kubmetr qaz hasil edir.
ARDNŞ-nin rəhbərliyi "Neft Daşları"-da qazma işlərinin sürətləndirilməsi və neft hasilatının stabilləşməsi məqsədilə NQÇİ-nin bütün lazımi maliyyə və maddi-texniki resurslarının ayrılmasını təmin edir.
Bu tədbirlər Azərbaycan prezidentinin NQÇİ-də hasilat həcminin 812 mindən 1,2 milyon tonadək atırılmasına dair sərəncamı çərçivəsində həyata keçirilir. 2008-ci ildə yataqda ümumi neft hasilatı 936 min 420 ton olacaq. 2009-cu ildə NQÇİ neft hasilatını 1 mln. 20 min tonadək artırmağı planlaşdırıb.
ARDNŞ geoloqlarının qiymətləndirmələrinə görə, "Neft Daşları"yatağındakı neft qalıqları 30 mln. ton təşkil edir. Yataqda neft hasilatının artırılması üçün 2010-cu ilədək ARDNŞ 78 yeni quyu qazacaq.