Azərbaycan, Bakı, 01 sentyabr/ Trend , müxbir E.İsmayılov/ SOCAR Energy Georgia şirkəti ilin sonunadək Gürcüstan bazarında satılan yanacağın həcmini hazırki 100 min litrdən 150 min litrədək artırmağı planlaşdırır, şirkətin Baş direktoru Mahir Məmmədov bazar ertəsi telefonla Trend -a bildirib. Satış həcmini yanacaqdoldurma məntəqələrinin (YDM) sayını artırmaqla yüksəltmək planlaşdırılır.
"İlin sonunadək daha bir neçə YDM istismara verməklə satış həcmini 150 min litrədək artırmaq istəyirik", - Məmmədov bildirib.
Gürcü-osetin münaqişəsinə baxmayaraq, Azərbaycan Dövlət Neft Şirkətinin Gürcüstan ərazisindəki yanacaqdoldurma məntəqələrinin işi normal rejimdə həyata keçirilir. Yanacaqdoldurma məntəqələri üçün nəzərdə tutulan neft Tbilisiyədək gətirilir, buradan isə avtonəqliyyatla YDM-ə paylanır.
Cari həftə şirkət Potidəki yeni məntəqəni istismara verməyi planlaşdırır. Bu məntəqəni avqustun 6-7-də istismara vermək planlaşdırılsa da, Gürcüstanda münaqişənin başlaması buna imkan verməyib. Əvvəllər Teleti, Bolnisi və Qurcaanidə YDM açılıb.
Şirkət bir-iki ay ərzində Tbilisidə daha iki məntəqəni istismara verməyi planlaşdırır (birincisi Vahuşti rayonu, ikincisi - Saburtalo rayonunda).
İlin sonunadək Tbilisidə daha üç YDM-in açılışı gözlənilir. İlin sonunadək Dmanisi və Kutasisidə də məntəqələrin istismara verilməsi planlaşdırılır. Tbilisidəki iki yanacaqdoldurma stansiyası layihələndirmə mərhələsindədir.
Hazırda Azərbaycan Dövlət Neft Şirkətinin Gürcüstan ərazisində 14 yanacaqdoldurma məntəqəsi fəaliyyət göstərir. SOCAR Georgia-nın təsisçiləri aşağıdakılardır: ARDNŞ - 51 faiz, Petro-Trans FZCO - 32,7 faiz və İvan Çxartişvili - 16,3 faiz.
Müəlliflə əlaqə saxlamaq üçün elektron ünvan: [email protected]
