Azərbaycan, Bakı, 20 sentyabr/ Trend müxbir E.İsmayılov/ "Azərbaycanın Dövlət Neft Şirkəti (ARDNŞ) Naxçıvan Muxtar Respublikası (NMR) ərzazisində yeraltı qaz anbarının tikintisi layihəsi çərçivəsində ilk quyuların qazılmasına başlayıb", - Dövlət Neft Şirkətinin prezidenti Rövnəq Abdullayev şənbə günü bildirib.
ARDNŞ artıq bu layihənin realizəsi üçün müəssisə yaradıb. "Qaz anbarının tutumu 300 mln. kubmetrədək olacaq", - Abdullayev qeyd edib.
Naxçıvan Muxtar Respublikası blokadadır. NMR - ə qaz tədarükü İran ərazisi vasitəsilə svop sistemi üzrə həyata keçirilir. Lakin abunəçilərin və NMR- dəki modul elektrik stansiyasının qazla etibarlı təchizatı üçün qaz anbarının tikintisi lazımdır. Azərbaycan prezidenti İlham Əliyev bu barədə tapşırıq verib.
2008 - ci ildə Azərbaycanın qaz anbarlarına ("Qaradağ" və "Qalmaz") 1,4 mlrd. kubmetrdən çox qaz vurulacaq. Ötən il qaz anbarlarına 1 mlrd. kubmetrdən çox qaz vurulub. Bu qaz həcmindən 2007-2008 - ci illərin payız - qış dövründə abunəçilərin təminatı üçün istifadə edilib.
Azərbaycanın Dövlət Neft Şirkəti anbarlara vurulan qazı şəxsi vəsaitləri hesabına müstəqil işlədiyi yataqlardan hasil edir. ARDNŞ cari il ərzində 8 mlrd. kubmetr qaz hasil etmək niyyətindədir. Azərbaycan "Azəri - Çıraq - Günəşli" yataqlarından təxminən 1,4 mlrd. kubmetr, "Şahdəniz" qaz - kondensat yatağından isə, 2,9 mlrd. kubmetr qaz alacaq.
Müəlliflə əlaqə saxlamaq üçün elektron ünvan: [email protected]