Azərbaycan, Bakı, 05 noyabr/ Trend / Türkiyənin "Botas" dövlət boru kəməri şirkəti yanvar-sentyabrda Azərbaycandan 3,4 mlrd. kubmetr qaz idxal edib ki, bu da bütövlükdə 2007-ci ildə tədarük olunan həcmdən 2,1 mlrd. kubmetr çoxdur. Bu barədə şirkətin rəsmi saytında yerləşdirilən məlumatda bildirilir.
Azərbaycan Cənubi Qafqaz boru kəməri vasitəsilə Türkiyəyə "Şahdəniz" yatağından hasil olunan qazı ixrac edir.
Yanvar - sentyabrda "Botas" müxtəlif mənbələrdən Türkiyəyə təqribən 28,6 mlrd. kubmetr qaz idxal edib. Ümumilikdə 2007 - ci ildə bu göstərici 36,5 mlrd. kubmetrə bərabər olub. Bu dövr ərzində Türkiyəyə Rusiydan təqribən 17,6 mlrd kubmetr qaz idxal olunub ki, bu da ötən ilin göstəricisinə nisbətdə 5,5 mlrd. kubmetr azdır. İrandan isə, Türkiyəyə təqribən 3 mlrd. kubmetr qaz idxal olunub. Bu göstərici 2007- ci ildə 6,2 mlrd. kubmetr qaz təşkil edib.
Türkiyəyə Əlcəzair və Nigeriyadan yanvar - sentyabrda, müvafiq olaraq, 4,1 mlrd. kubmetr və 399 mln. kubmetr səmt qazı idxal olunub.
"Şahdəniz" yatağının işlənməsinə dair müqavilə 1996 - cı il iyunun 4 - də imzlanıb. Layihə iştirakçıları bunlardır: BP (operator) -25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO- 9 faiz, SOCAR - 10 faiz..
