Azərbaycan, Bakı, 08 noyabr/ Trend / SOCAR şirkətinin (Azərbaycanın Dövlət Neft Şirkəti) "Azneft" İstehsalat Birliyi (neft və qaz hasilatı) SOCAR şirkətinin müstəqil işlədiyi "Günəşli" yatağının dayazsulu hissəsində yerləşən genişləndirilmiş "Günəşli -11" platformasından ilk quyunun qazılmasını başa çatdırıb. Hazırda yeni quyunun mənimsənilməsi gedir.
Layihəyə əsasən, yeni blokdan altı qaz quyusu qazmaq və istismara vermək planlaşdırılır. Bu il "Günəşli" yatağında ümumilikdə yeddi yeni qaz quyusunu istismara vermək planlaşdırılır.
16 quyunun qazılması üçün nəzərdə tutulmuş "Günəşli-11" platforması 1986-cı ildə istismara verilib. Bütün quyular qazılıb və hazırda istismar olunur. 2006- cı ilin dekabrında mövcud platformaya əlavə blok birləşdirilib. Blokun hündürlüyü 113 metr, çəkisi 1060 ton təşkil edir. O, suyun 102 metr dərinliyində quraşdırılıb.