Azərbaycan, Bakı, 18 noyabr/ Trend / Ekol Muhendislik Xidmetleri QSC və Salyan Oil əməliyyat şirkəti (ƏŞ) noyabrın sonunadək şirkətin istehsal sahələrinin qazma şlamından təmizlənməsi və torpaqların mexaniki və bioloji yolla rekultivasiyası haqqında müqavilə imzalayacaqlar, - QSC-nin çərşənbə axşamı yayılan məlumatında bildirilir.
Bütün hazırlıq işləri başa çatdırılıb və QSC dekabrda işlərə başlamağı planlaşdırır. Ekol-un mütəxəssisləri artıq ƏŞ-in sahələrində araşdırmalar apararaq işlərin həcmini müəyyən edib və sazişin şərtləri haqqında razılığa gəliblər.
Salyan Oil Azərbaycanda quruda "Kürsəngi-Qarabağlı" yatağının işlənilməsi ilə məşğul olur. "Kürsəngi - Qarabağlı" yatağının işlənilməsinə dair sazişin müddəti 25 ildir. Layihənin səhmdarları aşağıdakılardır: ARDNŞ - 50 faiz, hər birinin 25 faiz iştirak payı olan iki Çin şirkəti China National Oil & Gas Exploration and Development Corp. (CNODC) və CNPC (Hong Kong) Ltd. (CNPCHK).
Abşeron yarımadasında mövcud ekoloji problemlərin həlli üçün 2006-cı il martın 1-də yaradılmış Ekol Muhendislik Xidmetleri QSC-nin həmtəsisçiləri SOCAR şirkəti (Azərbaycanın Dövlət Neft Şirkəti) - 51 faiz və Lancer S.A. Services şirkətidir - 49 faiz, - SOCAR-ın rəsmi İnternet saytında bildirilir.