Azərbaycan, Bakı, 19 noyabr/ Trend , müxbir A.Bədəlova/ Böyüklüyünə görə dünyada üçüncü olan Amerikanın JPMorgan bankının proqnozlarına görə, 2009-cu ildə dünyanın neftə tələbatı sutkada 0,5 mln. barel azalaraq 85,2 milyona çatacaq.
JPMorgan-nın proqnozlarına görə, 2008-ci ilin dördüncü rübündə neftə tələbat sutkada 86,2 mln. barel təşkil edəcək. Bu il dünyanın neftə tələbatı sutkada 85,7 mln. barel təşkil edəcək ki, bu da 2007-ci ilin analoji dövrü ilə müqayisədə 0,1 mln. barel çoxdur.
Bank 2010-cu ildə dünyanın neftə tələbatının sutkada 87,4 mln. barel, 2011-ci ildə 88,9 mln.barel, 2012-ci ildə 90,6 mln. barel, 2013-cü ildə isə 92,3 mln. barelədək artacağını proqnozlaşdırır.
JPMorgan İqtisadi Əməkdaşlıq və İnkişaf Təşkilatı (İƏİT) ölkələrində neft üzrə tələbat artımı proqnozlarını azaldıb. Yeni proqnozlara görə, 2008-ci ildə bu ölkələrdə neftə tələbat sutkada 47,9 mln. barel təşkil edəcək ki, bu da ötən ilin göstəricilərinə nisbətdə 1,4 mln. barel azdır. 2009-cu ildə İƏİT ölkələrində neftə tələbat sutkada 1,1 mln. barel azalacaq və 46,9 mln. barelə çatacaq.
İƏİT-ə daxil olmayan ölkələrdə neftə tələbat 2009-cu ildə sutkada 0,5 mln. barel artaraq 38,3 mln. barelə çatacaq. Bu göstərici 2008-ci il üçün 37,8 mln. barel proqnozlaşdırılıb.
JPMorgan 2008-ci ildən 2013-cü ilədək olan dövrdə OPEK-ə daxil olmayan ölkələrin neft tədarükü həcmlərinin azalacağını proqnozlaşdırır. Proqnozlara əsasən, 2008-ci ildə bu ölkələrin tədarükləri sutkada 49,8 mln. barel, 2009-cu ildə 49,7 mln. barel, 2010-cu ildə 49,2 mln. barel, 2011-ci ildə 48,6 mln. barel, 2012-ci ildə 47,9 mln. barel, 2013-cü ildə 47,6 mln. barel təşkil edəcək.
Məqalə müəllifi ilə əlaqə ünvanı - [email protected]