Azərbaycan, Bakı, 27 noyabr/ Trend , müxbir İ.Xəlilova/ Azərbaycan Dövlət Neft Fondunun (ARDNF) məlumatlarına görə, 2008 - ci ilin yanvar - sentyabrı ərzində Fondun gəlirləri 9 190,2 milyon manat, xərcləri 2 498,2 milyon manat təşkil edib.
Fondun daxilolmalarının böyük hissəsi (98,6 faiz) mənfəət neftinin satışından əldə edilib. Fondun neft sazişlərinin həyata keçirilməsi ilə bağlı gəlirləri 9 127,2 milyon manat, o cümlədən mənfəət neftinin satışından 9 060,7 milyon manat, akrhesabı ödənişlərdən 0,8 milyon manat, bonus ödənişlərindən 2,8 milyon manat, Bakı -Tbilisi - Ceyhan layihəsi üzrə dividentlərdən - 60,4 milyon manat, tranzit haqqı 0,1 milyon manat təşkil edib.
Hesabat dövrü ərzində xarici sərmayədarlar tərəfindən təhvil verilmiş aktivlərdən 2,4 milyon manat vəsait əldə edilib. Doqquz ay ərzində Neft Fondunun vəsaitlərinin idarə olunmasından əldə olunan gəlir 63,0 milyon manat olub.
Neft Fondunun xərclər strukturunda qaçqın və məcburi köçkün ailələrinin məskunlaşdırılması və sosial - məişət vəziyyətinin yaxşılaşdırılması üzrə tədbirlərin həyata keçirilməsinə 85,5 milyon manat, Samur - Abşeron suvarma sisteminin yenidən qurulması və Oğuz - Qəbələ zonasından Bakı şəhərinə su kəmərinin çəkilişi layihələrinin maliyyələşdirilməsi məqsədilə, müvafiq olaraq, 79,5 milyon manat və 135,8 milyon manat vəsait ayrılıb. Dövlət büdcəsinə transfertlər 2 190,0 milyon manat təşkil edib. Bakı - Tbilisi - Qars yeni dəmir yolu magistralının tikintisinin maliyyələşdirilməsinə 3,7 milyon manat yönəldilib. 2007 - 2015 - ci illərdə Azərbaycan gənclərinin xarici ölkələrdə təhsili üzrə Dövlət Proqramının maliyyələşdirilməsinə Neft Fondundan 0,6 milyon manat vəsait ayrılıb.
2008 - ci ilin 9 ayı ərzində Neft Fondunun idarə edilməsi ilə bağlı xərcləri 3,1 milyon manat olub. Neft Fondu 22,5 milyon manat məbləğində mənfəət vergisi və digər vergilər ödəyib. Fondun valyuta aktivlərinin yenidən qiymətləndirilməsi ilə bağlı büdcədənkənar xərcləri 383,1 milyon manat təşkil edib.
2008 - ci il oktyabrın 1-nə Fondun aktivləri ilin əvvəlinə nisbətən 4 dəfə artaraq? 8 378,8 mln. manat (10 382,2 milyon ABŞ dolları) olub.
Neft Fondunun dəqiqləşdirilmiş proqnozlarına görə, onun gəlirləri əvvəlki proqnozla müqayisədə 2,8 dəfə artaraq? 10 144 743,2 min manat, xərcləri 2,6 dəfə artımla 4 380 853,6 min manat təşkil edib.
Cari mübadilə məzənnəsi -- 0,8079 AZN/USD.
Müəlliflə əlaqə saxlamaq üçün elektron ünvan: [email protected]
