Azərbaycan, Bakı, 27 noyabr/ Trend / İraqın şimalındakı kürd administrasiyası 2009-cu ilin əvvəlindən, xam neft ixrac edəcəklərini bildirib. Bu barədə Türkiyənin "Cihan" informasiya agentliyi məlumat verib.
Neft ixracatının ilkin mərhələdə 100 min barel, 2009 - cu ilin sonuna qədər isə, 250 min barelə çatdırılacağı gözlənilir.
Kurd administrasiyasının təbii ehtiyatlar naziri Aşti Havraminin sözlərinə görə, ixracat İraqın mərkəzi hökumətinin Neft Nazirliyi ilə uzlaşdırılmış şəkildə həyata keçiriləcək.
Neft ixracatı Dohukdakı Tavki ve Ərbilin cənubundakı Tak-Tak neft ərazilərindən həyata keçiriləcək. Xam neft boru kəməri ilə Türkiyədəki Ceyhan limanına nəql ediləcək, - Havrami bildirib. İraqın Neft Nazirliyinin nümayəndəsinin sözlərinə görə, o, kürd administrasiyasının xam nefti ixrac etməsinə dair hər hansı bir məlumata malik deyil. Bağdad bəyan edir ki, kürd administrasiyasının yataqların müstəqil işlənilməsi haqqında bəyanatı ölkə Konstitusiyasına ziddir.
"İraq hökuməti Kərkük neftinin hasilatına tam nəzarət etmək və kürdlərə verilən gəlirin məbləğini müəyyən etmək niyyətindədir. Regional kürd administrasiyası isə, buna mane olmaq istəyir", - türkiyəli ekspert Fikrət Ərtan əvvəllər telefonla Trend -a bildirib.
Beynəlxalq Böhran qrupunun ekspertləri ehtiyat edirlər ki, yaxın vaxtlarda İraqda kürdlər və ərəblər arasında ciddi münaqişə yarana bilər. münaqişəyə səbəb kimi Kərkük şəhərindəki yatağı göstərirlər.
İraqın iri "Kərkük" yatağı 1934 - cü ildən istismar edilir. Neftli laylar 300 -1400 metr dərinlikdə yerləşir. Hasil edilən neftin sıxlığı - 0,84-0,86 q/sm3, kükürdün miqdarı - 2 faiz. Geoloji xammalın ehtiyatları 2,2 mlrd. ton təşkil edir. Neft "Kərkük" yatağından daimi fasilələrlə boru kəməri ilə Türkiyənin Ceyhan limanına nəql edilir.
