...

"Nabucco" qaz kəməri Avropada möhkəm qaz bazarı yaratmağa kömək edəcək – Nabucco Gas Pipeline International-ın idarəedici direktoru

Energetika Materials 15 Yanvar 2009 15:35 (UTC +04:00)

Azərbaycan, Bakı, 15 yanvar / Trend , müxbir A.Bədəlova/ ""Nabucco" qaz kəməri Avropada daha davamlı qaz bazarının yaradılmasına kömək edə bilər", - "Nabucco" konsorsiumunun idarəedici direktoru Reynhard Mitçek BBC-yə müsahibəsində bildirib. Müsahibə Nabucco Gas Pipeline International-ın rəsmi saytında yerləşdirilib.

"Biz gələcəkdə qaz kəmərinin istehlakçıların ehtiyaclarını ödəyəcəyini və Avropada daha davamlı qaz bazarı yaradacağını gözləyirik", - Mitçek deyib.

Dünya maliyyə böhranının layihəyə təsirindən danışan konsorsiumun direktoru maliyyə və əmtəə bazarlarındakı vəziyyətin şübhəsiz ki, layihəyə təsir göstərəcəyini vurğulayıb.

"Lakin indi bizim gördüyümüz poladın qiymətinin azalmasıdır və bu, layiyəhə müsbət təsir göstərir", - Mitçek deyib.

Onun sözlərinə görə, maliyyə institutları kreditləri təqdim edərkən uzunmüddətli layihələrə üstünlük verəcəklər və beləliklə də, bazardakı hazırkı vəziyyət "Nabucco" kimi layihələr üçün az-çox faydalıdır.

"Bu gün səhmdarların layihə üzrə fikir ayrılıqları yoxdur", - Mitçek əlavə edib.

"Təbii ki, liberallaşma və diversifikasiyaya məruz qalmış Avropanın qaz bazarında şirkətlər müxtəlif layihələr üzərində işləyirlər. Lakin bu, onların "Nabucco" üzrə baxışlarına mənfi şəkildə təsir göstərmir", - Mitçek deyib.

Konsorsiumun direktoru bir daha vurğulayıb ki, hazırda layihə üzrə hökumətlərarası sazişlər Avropa Komissiyası və iştirakçı ölkələrin hökumətləri arasında danışıqlar mərhələsindədir. Gözlənildiyi kimi, sazişlərin imzalanması mərasimi 2009-cu ilin birinci rübündə keçiriləcək.

Dəyəri 12,4 mlrd. dollar olan "Nabucco" qaz kəməri ilə 2013-cü ildən Azərbaycan və Mərkəzi Asiyadan Avropa Ittifaqı ölkələrinə qaz ixrac etmək üçün nəzərdə tutulur. Qaz kəmərinin çəkilməsi 2010-cu ilə təyin edilib. Boru kəmərinin maksimal ötürmə gücü ildə 31 mlrd. kubmetr olacaq. Layihənin iştirakçıları OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botas və Almaniyanın RWE şirkətləridir. Onların hər biri bərabər paya - 16,67 faiz paya malikdir.

Müəlliflə əlaqə saxlamaq üçün elektron ünvan: с[email protected]  

Xəbər lenti

Xəbər lenti