Azərbaycan, Bakı, 23 yanvar/ Trend , müxbir E.İsmayılov/
"Azəriqaz" QSC (Azərbaycanda qazın paylanması üzrə təbii inhisarçı) ölkənin qaza olan ehtiyacının ödənilməsi üçün indiyədək ölkənin yeraltı qaz anbarlarından təxminən 470 mln. kubmetr qaz götürüb, - "Azəriqaz"ın rəhbəri Əlixan Məlikov cümə günü bildirib. Əvvəllər qaz anbarlarına 1,4 mlrd. kubmetr qaz vurulmuşdu.
"2008-ci ildə anbarlara vurulmuş qazın artıq 470 mln. kubmetri istifadə edilib və orada hələ təxminən 930 mln. kubmetr qalıb", - Məlikov deyib.
Onun sözlərinə görə, ölkə əhalisinin "mavi yanacaqla" təmin edilməsi üçün qaz anbarlarından sutkada təxminən 10 mln. kubmetr qaz götürülür.
Ötən il 2008-2009-cu illərin payız-qış mövsümündə istifadə etmək üçün yeraltı qaz anbarlarına 1,4 mlrd. qaz vurulub, - QSC-nin rəhbəri bildirib.
2007-ci ildə qaz anbarlarına 1 mlrd. kubmetrdən çox qaz vurulmuşdu. Yanacağın bu həcmi 2007-2008-ci illərin payı qış dövründə abunəçiləri təmin etmək üçün istifadə edilib. 2006-2007-ci illərdə istifadə etmək üçün qaz anbarlarına 1,024 mlrd. kubmetr qaz vurulmuşdu.
Azərbaycanda iki yeraltı qaz anbarı var - Qaradağ və Qalmaz.
Müəlliflə əlaqə saxlamaq üçün elektron ünvan: [email protected]