Azərbaycan, Bakı, 30 mart / Trend /
AMEA-nın rəsmi saytında yer alan məlumata əsasən, Azərbaycan Milli Elmlər Akademiyası yanında Y.Məmmədəliyev adına Neft-Kimya Prosesləri İnstitutu və elmi-tədqiqat mərkəzləri 2009-2012-ci illər ərzində Avropa institutları ilə Avropa İttifaqının FP-7 proqramı çərçivəsində birgə işlər aparacaqlar. Birgə işlər yüksək elektrik keçirməsinə malik metal-polimer materialları sintezinin yeni üsullarının hazırlanması, sudan hidrogen alınması prosesinin effektiv katalizatorlarının axtarışı və maqnit elektrik keçirməsinə malik olan yeni polimer materialların öyrənilməsi istiqamətində aparılacaq.
Məlumatda deyilir ki, bununla yanaşı, birgə araşdırmalar çərçivəsində metanın metanola çevrilməsinin effektiv katalizatorlarının tədqiqatı, nanoölçən klasterlərin və molekulyar maqnetitlərin yeni sintez növlərinin araşdırılması, effektiv, qənaətli və ekoloji biodizellərin əldə olunması mexanizmlərinin işlənilməsi nəzərdə tutulur.
