Qazaxıstan, Astana, 31 mart / Trend , müxbir K.Arınova /
Bu ilin aprelində Qazaxıstan prezidenti Nursultan Nazarbayevin Pekinə rəsmi səfəri gözlənilir. Bu barədə Astanada Trend -un xüsusi müxbirinə Çinin Qazaxıstandakı fövqəladə və səlahiyyətli səfiri Çen Qopin məlumat verib.
"Səfər təqribən cari ilin aprel ayının ortalarında planlaşdırılır", - deyə Qopin bildirib.
Çin səfiri səfər zamanı Çinin Milli Neft-Qaz Korporasiyasının (CNPC) iri özəl neft hasilatı şirkəti "Manqistaumunayqaz"ın səhmlərinin 50 faizini almasına dair məsələnin müzakirə olunacağını təsdiq edib.
"Bu məsələyə Qazaxıstan prezidenti Nazarbayevin bu ilin aprelində Çinə rəsmi səfəri zamanı toxunulacaq. Səfər zamanı Qazaxıstanın neft-qaz sektorunda yeni birgə layihələrlə bağlı bir sıra mühüm sənədlərin imzalanacağı gözlənilir", - deyə diplomat bildirib.
Qazaxıstan Respublikası XİN-in məlumatına görə, Çin ölkənin ticarət tərəfdaşları siyahısında dördüncü yeri tutur. ÇXR-in QR-nın xarici ticarətində payı 10 faizdən çox təşkil edir.
Əməkdaşlıq illərində ÇXR-in ölkə iqtisadiyyatına yatırdığı investisiyaların həcmi 9 mlrd.dollar təşkil edir.
Çin Qazaxıstanın enerji bazarına 1997-ci il 24 sentyabr tarixində iki ölkə arasında neft və qaz sahəsində əməkdaşlıq barədə hökumətlərarası Saziş, həmçinin Qazaxıstan Respublikasının Energektika və Mineral Sərvətlər Nazirliyi və Çin Milli Neft Korporasiyası (SNRS) arasında Qazaxıstandan Çinə neft-qaz boru kəmərinin çəkilməsi və Qazaxıstanda yataqların işlənməsi layihələri barədə Ümumi Sazişin imzalanmasından sonra daxil olub.
Çinin CNPC, SINOPEC və CITIC şirkətləri neft hasilatında fəal iştirak edir. İndiyədək Çin şirkətlərinin iştirakı ilə Qazaxıstanda hasil edilən neftin həcmi 20 mln. ton təşkil edir. Bu həcmin təqribən 13 mln. tonu Çinin payına düşür.
Məqalə müəllifi ilə əlaqə ünvanı - [email protected]
