Gürcüstan, Tbilisi, 02 aprel / Trend , müxbir N.Kirtsxaliya /
Bütün Qərbi Gürcüstan Acariyanın Helvaçauri kəndində əsası qoyulan elektrik ötürmə xəttinin (EÖX) işə salınmasından sonra enerji müstəqilliyi əldə edəcək. Bu haqda cümə axşamı Mixail Saakaşvili EÖX-nin inşasının açılış mərasimində deyib.
Yeni EÖX-nin inşasına Çexiyanın "Enerqo-pro Corciya" şirkəti başlayıb. Yeni xətt elektrik enerjisini Türkiyəyə ixrac etmək imkanı verəcək. 20 kilometrlik EÖX Batumi və Myuratli yarımstansiyaları arasında əlaqə yaratmaq imkanı verəcək. 110 kVt-lıq xəttin gücü 180 mVt təşkil edəcək. Layihənin dəyəri 20-25 mln. dollar təşkil edir. 400 nəfər insanın işlə təmin olunması gözlənilir.
"Səhmdarlara hər cür yardım etməyi söz verirəm. Onlar layihəni həyata keçirmək üçün bizdən tam dəstək alacaqlar", - Saakaşvili deyib. Saakaşvili Gürcüstan regionlarına elektrik enerjisinin paylanmasını gerçəkləşdirən "Enerqo-pro"-ya bütün kəndlərdə individual sayğacların quraşdırılmasının vacibliyini və kommunal sayğacların "keçmişin qalıntısı" olduğunu xatırladıb.
"Bu istiqamətdə dövlətin də yardım edəcəyinə söz verirəm", - Saakaşvili qeyd edib.
Mərasimdə Çexiyanın Gürcüstandakı səfiri İvan Estrab və Gürcüstan energetika naziri Aleksandr Xetaquri iştirak ediblər.
Məqalə müəlifi ilə əlaqə ünvanı: [email protected]