Azərbaycan, Bakı, 23 aprel / Trend /
SOCAR şirkəti (Azərbaycan Dövlət Neft Şirkəti) yaxın günlərdə Xəzərin Azərbaycan hissəsində yerləşən "Neft Daşları" iri dəniz neft yatağında yeni platforma (2415 saylı) istifadəyə verməyə hazırlaşır. Bu barədə şirkətin məlumatında bildirilir. Hazırda burada sınaq qazma işləri aparılır.
"Neft Daşları - 2415" platforması suyun 23 metr dərinliyindən quraşdırılıb. Burada 12 quyunun qazılması planlaşdırılır.
SOCAR ilin sonunadək yataqda "Neft Daşları - 2521" platformasını da istifadəyə verməyi planlaşdırır. Bu platforma artıq quraşdırılıb. Onun bloklarının hündürlüyü 27 metr təşkil edir. Platformada 12 quyunun qazılması nəzərdə tutulub.
SOCAR "Neft Daşları - 2585" dördbloklu platformanın tikintisi üzrə də iş aparır. Onun bloklarının hündürlüyü 64 metrdir. Platforma "Neft Daşları - 1887" beşbloklu platformasından 500 metr məsafədə, suyun 54 metr dərinliyində quraşdırılacaq.
Platformaların tikintisi Azərbaycan Respublikası prezidentinin "Neft Daşları" Neft-Qaz Çıxarma Idarəsi (NQÇİ) tərəfindən hasilat həcminin 812 min tondan 1,2 mln. tonadək (1,5 dəfə) artırılması ilə bağlı sərəncamı çərçivəsində həyata keçirilir. SOCAR geoloqlarının hesablamalarına görə, "Neft Daşları" yatağında neft ehtiyatlarının qalıq həcmi 30 milyon ton təşkil edir. SOCAR yataqda neft hasilatının artırılması üçün 2010-cu ilədək daha 78 yeni quyu qazacaq.
Yeni platformalar ilk növbədə ehtiyatları əhəmiyyətli dərəcədə işlənən yataqda neft hasilatı həcminin sabit saxlanılması üçün lazımdır.
Məqalə müəllifi ilə əlaqə ünvanı: [email protected]