Qazaxıstan, Astana, 04 iyun / Trend , müxbir K.Konırova /
"2008-ci ildə Azərbaycanın dəmir yolları vasitəsilə 1 milyon ton "Tengiz" nefti daşınıb", - Azərbaycan Dəmir Yolu İdarəsinin baş mühəndisi Qurban Nəzirov deyib.
"Ötən il 1 milyon ton Tengiz nefti daşıdıq. Bu il nə qədər daşıya biləcəyimizi söyləmək çətindir, çünki son zamanlar Qazaxıstandan neft tədarükü həcminin azalması müşahidə olunur", - Astanada, Dəmir Yolu Əməkdaşlıq Təşkilatının Nazirlər Şurasının 37-ci sessiyasında iştirak edən Nəzirov deyib.
Onun sözlərinə görə, Qazaxıstandan gələn taxılın həcmində dəyişiklik yoxdur.
"Qazaxıstandan taxıl gəlməkdə davam edir, həcmlər ötənilki kimi qalıb - ayda 10-30 min ton", - o deyib.
Nəzirov əlavə edib ki, bu gün Bakıdakı taxıl terminalı vasitəsilə quru yüklü gəmilərdən elevatora təxminən 3 min ton taxıl boşaldılır. Buradan onlar azərbaycanlı istehlakçılara çatdırılır. "Hazırda bu marşrutla Qazaxıstan taxılının Gürcüstana çatdırılması həyata keçirilir", - Nəzirov deyib.
Məqalə müəllifi ilə əlaqə ünvanı: [email protected]
