Azərbaycan, Bakı, 13 avqust / Trend , müxbir E. İsmayılov /
ARDNŞ (Azərbaycan Dövlət Neft Şikrəti) "Şah Dəniz" dəniz qaz-kondensat yatağının işlənməsi çərçivəsində tərəfdaşlarla Türkiyə ərazisi ilə tranzit müqaviləsi məsələsini müzakirə edir. Bunu cümə axşamı ARDNŞ rəhbəri Rövnəq Abdullayev deyib.
"Tranzit üzrə Türkiyə ilə danışıqlarda texniki məsələlərin böyük hissəsini həll etmişik, yalnız cüzi dəqiqləşdirmələr qalıb. Hazırda bu məsələ üzrə "Şah Dəniz" layihəsi çərçivəsində tərəfdaşlarımızla məsləhətləşmələr aparırıq və məsləhətləşmələrdən sonra onu həll etməyə çalışacağıq", - Abdullayev deyib.
Abdullayevin dediyi kimi, "Şah Dəniz"in birinci mərhələsi çərçivəsində Azərbaycan qazının Türkiyə üçün qiymətinə dair texniki göstəricilər, eləcə də layihınin ikinci fazası çərçivəsində Türkiyə üçün əvvəlcədən təyin olunmuş həcm məsələlərinin böyük hissəsi həll edilib.
Azərbaycan və Türkiyə tərəfləri tədricən qazın qiymətinin formuluna dair ümumi mövqeyə yaxınlaşırlar. "Əsas problem qiymətin müəyyənləşdirilməsi formuludur. Bu planda Türkiyənin öz, bizim öz mövqeyimiz var. Lakin yavaş-yavaş mövqelərimiz yaxınlaşır", - Abdullayev əlavə edib.
Bu gün Azərbaycan qazı Türkiyəyə 1000 kubmetri 120 dollara satılır. Bununla yanaşı, Türkiyənin daxili bazarında istehlakçılar üçün qazın qiyməti hər 1000 kubmetr üçün təxminən 380 dollardır.
Türkiyə ilə imzalanmış müqavilədə göstərildiyi kimi, "Şah Dəniz" qazının qiyməti tədarükə başlayandan bir il sonra yenidən baxıla bilər, yəni yeni qiymətlər 2008-ci il aprelin 15-dən tətbiq ediləcək.
Müqaviləyə əsasən, Türkiyə layihənin işlənməsinin birinci mərhələsi çərçivəsində "Şah Dəniz" yatağından 6,6 milyard kubmetr qaz almalıdır. Layihə üzrə tərəfdaşlar tədarükün bu həcminə bu il nail olacaqlar.
"Şahdəniz" yatağının işlənməsinə dair müqavilə 1996-cı il iyunun 4-də imzlanıb. Layihə iştirakçıları bunlardır: BP (operator) -25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO- 9 faiz, ARDNŞ - 10 faiz.
Məqalə müəllifi ilə əlaqə ünvanı: [email protected]