Azərbaycan, Bakı, 13 avqust / Trend , müxbir E.İsmayılov /
"ARDNŞ-nin (Azərbaycan Respublikası Dövlət Neft Şirkəti) ölkə xaricində yerləşdirdiyi sərmayələr davam edən dünya maliyyə-iqtisadi böhranı şəraitində gəlir gətirməyə başlayıb", - cümə axşamı şirkətin prezidenti Rövnəq Abdullayev deyib.
"Şirkətin böhrandan əvvəl yatırdığı sərmayələr artıq gəlir gətirməyə başlayıb", - Abdullayev bildirib.
Abdullayev, xüsusilə Türkiyə və Gürcüstana qoyulan sərmayələri qeyd edib.
Belə ki, ARDNŞ-nin həmsahibi olduğu Türkiyənin "Petkim" neft-kimya kompleksi bu ili yüksək məhsuldarlıqla işləyir. Kompleksin ilin birinci yarısında gəlirləri 30 milyon dollara yaxın olub. "Kompleksin gecə istehsal etdiyi məhsul artıq səhər alınır. Odur ki, məhsul anbarlarda qalmır. Bu sevindirici haldır, çünki Azərbaycanın sərmayələri gəlir gətirməyə başlayıb", - Abdullayev əlavə edib.
Bir müddət əvvəl ARDNŞ ilə Turcas Petrol/Injaz Projects-in alyansı "Petkim" kimya konserninin 51 faizlik səhmlərinin alınması üzrə elan olunan tenderdə 2,04 milyard dollar təklif edərək qalib olmuşdu. Hazırda Türkiyə lazım olan kimya məhsullarının 70-75 faizini idxal edir. SOCAR/Turcas/Injaz-ın Petkim-in inkişafına yönəltdiyi sərmayələr isə məhsul idxalını 30 faizə qədər azaltmağa imkan verəcək.
Petkim Petrokimya Holding plastik örtüklər, parçalar, yuyucu vasitələr istehsal edir və Türkiyədə belə məhsulların yeganə istehsalçısıdır. Şirkət məhsulun 1/4-ni ixrac edir.
Abdullayevin sözlərinə görə, ARDNŞ-nin Gürcüstanda qoyduğu sərmayələr də gəlir gətirməyə başlayıb. Şirkət həm Gürcüstan daxili bazarında qaz satışından, həm də şirkətin brendi altında bütün Gürcüstan üzrə işləyən yanacaqdoldurma stansiyalarından gəlir əldə edir.
Onun sözlərinə görə, şirkətin dünya maliyyə-iqtisadi böhranına baxmayaraq işi normallaşır. Böhran nəticəsində şirkət bir sıra proqramlara düzəlişlər etmək məcburiyyətində qalsa da, hər halda onlar realizə edilir.
Məqalə müəllifi ilə əlaqə ünvanı: [email protected]
