Azərbaycan, Bakı, 14 avqust / Trend , müxbir E.İsmayılov /
"İritutumlu tankerlərin girişi üçün Azərbaycanın Kulevi Qara dəniz neft terminalından aparılan dəniz dibinin dərinləşdirilməsi prosesinin avqustun sonu, sentyabrın əvvəlində başa çatdırılması gözlənilir", - cümə günü terminalda işlərə yaxın mənbədən məlumat verilib. Əvvəllər işlərin avqustun əvvəlində başa çatdırılacağı gözlənilirdi.
"Dəniz dibinin dərinləşdirilməsi işlərinin daha tez başa çatdırılması planlaşdırılsa da, hava şəraitinin pisləşməsi və yağış üzündən onun bu ayın sonu, gələn ayın əvvəlində bitirilməsi gözlənilir", - mənbədən deyilib. İşlərin planına əsasən, dərinləşdirmə prosesində ümumilikdə 2,2 milyon ton süxur emal ediləcək.
"Tengiz" yatağından çıxarılan Qazaxıstan neftinin terminal vasitəsilə nəqlinin başlanğıcı da bu prosesdən çox asılıdır. "Tengiz" yatağının işlənməsi ilə Qazaxıstan-ABŞ birgə şirkəti - "TengizŞevroyl" məşğul olur.
Bir müddət əvvəl terminaldakı digər mənbədən bildirilmişdi ki, "Tengiz" yatağından çıxarılan Qazaxıstan neftinin bu terminal vasitəsilə nəqlinin başlanğıcı üçün danışıqlar aparılır və mütəmadi görüşlər keçirilir. "Nəqlin başlanğıcının konkret vaxtı barədə danışmaq hələ tezdir, bu istiqamətdə hazırda işlər aparılır", - mənbədən deyilib.
Bu il Azərbaycan ərazisindən təxminən beş milyon ton Qazaxıstan neftinin nəqli planlaşdırılır ki, bunun da üç milyon tonunu "Tengiz" yatağından çıxarılan neft təşkil edir", - bir müddət əvvəl Bakıda, "KazMunayQaz" şirkətinin başçısı Kairgeldı Kabıldin demişdi.
ABŞ-nın ChevronTexaco şirkəti 2008-ci ildə Tengiz neftinin "Bakı-Tbilisi-Ceyhan" (BTC) kəməri ilə nəqlinə başlayıb. Razılaşmanın şərtlərinə əsasən, Tengiz nefti BTC və dəmiryol ilə gürcü imanlarına (Kulevi və Batumi) nəql ediləcək.
Statistika Komitəsinin məlumatlarına əsasən, bu ilin birinci yarısında BTC neft kəməri ilə 907,7 min ton Tengiz nefti nəql edilib.
Kulevi limanının sahibi ARDNŞ, Batuminin "KazMunayQaz"-dır.
Məqalə müəllifi ilə əlaqə ünvanı: [email protected]
