Azərbaycan, Bakı, 18 avqust / Trend , müxbir E.İsmayılov /
Sahiblərindən biri ARDNŞ (Azərbaycan Respublikası Dövlət Neft Şirkəti) olan Türkiyənin Petkim neft-kimya kompleksi ilin birinci yarısında 895,3 milyon türk lirəsi (597 milyon dollara yaxın) həcmində neft-kimya məhsulu realizə edib", - çərşənbə axşamı Petkim-dən deyilib. Kompleksin bu müddət ərzində əldə etdiyi xalis gəlir isə 26 milyon dollar təşkil edib.
Mənbənin sözlərinə görə, bu müddət ərzində Petkim ümumilikdə 663 min tona yaxın istehsal olunmuş məhsulu realizə edib. Birinci yarımildə neft-kimya kompleksi tərəfindən istehsal güclərindən 88 faizlik istifadə əmsalı ilə 1,4 milyon ton məhsul istehsal edilib. Petkim yanvar-iyun aylarında 129 milyon dollarlıq məhsul ixrac edib.
Petkim öz sərmayələri hesabına müəssisənin istehsal gücünün artırılması və istehsal prosesinin təkmilləşdirilməsi üzrə işlər aparır. Birinci yarımildə Petkim-in sərmayələri 19 milyon dollar təşkil edib.
Yanvar-iyun ərzində Petkim-in Türkiyənin daxili bazarındakı payı 25 faiz təşkil edib.
ARDNŞ şirkəti ilə Turcas Petrol/Injaz Projects-in alyansı, Petkim kimya konserninin 51 faizlik səhmlərinin alınması üzrə elan olunan tenderdə 2,04 milyard dollar təklif edərək qalib olmuşdu. Hazırda Türkiyə lazım olan kimya məhsullarının 70-75 faizini idxal edir, ARDNŞ/Turcas/Injaz-ın Petkim-in inkişafına yönəltdiyi sərmayələr isə məhsul idxalını 30 faizə qədər azaltmaq imkanı verəcək.
Petkim Petrokimya Holding plastik örtüklər, parçalar, yuyucu vasitələr istehsal edir və Türkiyədə belə məhsulların yeganə istehsalçısı olaraq qalır. Şirkət məhsulun 1/4-ni ixrac edir.
Məqalə müəllifi ilə əlaqə ünvanı: [email protected]
