Azərbaycan, Bakı, 11 sentyabr / Trend , müxbir E.Ismayılov /
"ARDNŞ-in (Azərbaycan Respublikası Dövlət Neft Şirkəti) "Tağıyev adına" Neft-Qaz Çıxarma İdarəsinin 9,3 hektarlıq istehsalat ərazisində ekoloji parkın yaradılması müəssisələrdə tullantıların minimallaşdırılması mexanizminin hazırlanması üçün stimul verəcək", - ARDNŞ-dəki mənbə deyib.
"Bu layihə ətraf mühitdə tullantısız mexanizmin tətbiqinin nümunəsi olacaq", - mənbə deyib.
Mənbənin dediyi kimi, hazırda layihə çərçivəsində layihələndirmə işləri aparılır, ərazinin hasarlanması başa çatdırılıb. Həmçinin binanın konstruksiyası müəyyənləşdirilib, tinglərin yetişdirilməsi üçün örtülü şitillik layihəsi başa çatmaq mərhələsindədir.
Parkda yetişdirilən bitkilər ARDNŞ-in tərkibinə daxil olan müəssisələrin sahələrinin yaşıllaşdırılması üçün istifadə ediləcək. Bitkilər ilk növbədə təmizlənmiş və bərpa edilmiş ərazilərdə əkiləcək.
Mənbənin bir müddət əvvəl dediyi kimi, layihənin realizəsinin birinci mərhələsində ilkin layihə gücünün əldə edilməsi planlaşdırlır. İlk mərhələdə ərazinin hasara alınması, lazımi infrastrukturun yaradılması planlaşdırılır və yeni növ birkilərin yetişdirilməsinə başlanılıb. Yeni ekoloji parkın enerjiyə tələbatının 20 faizi alternativ enerji mənbələrinin istifadəsi hesabına təmin ediləcək. Bu park üçün lazım olacaq 80-100 kilovat enerjinin təxminən 20 kilovatı alternativ enerji mənbələri hesabına təmin olunacaq.
"Ekoloji layihənin həyata keçirilməsinin ikinci fazasında alternativ növ enerjinin tətbiqinin genişləndirilməsi və parkın gərəkli enerji ilə təminatında onlardan istifadənin artırılması planlaşdırılır", - mənbə deyib.
"Parkın istilik təminatı qismən yataqlardan havaya buraxılan səmt qazı hesabına həyata keçiriləcək. Şəhərciyin elektrik enerjisinə tələbatı qismən günəş enerjisindən istifadə hesabına ödəniləcək. Suvarma üçün lazım olan su qurunt sularının təmizlənməsi və dəniz suyunun şirinləşdirilməsi hesabına alınacaq. Bu layihə çərçivəsində xarici ölkələrin və əcnəbi şirkətlərin təcrübəsindən istifadə olunacaq", - bir müddət əvvəl ARDNŞ-in ekologiya məsələləri üzrə vitse-prezidenti Muxtar Babayev deyib.
Məqalə müəllifi ilə əlaqə ünvanı: [email protected]
