Azərbaycan, Bakı, 16 sentyabr / Trend , müxbir E.İsmayılov /
Dekabrın sonunda "Ekol Mühəndislik Xidmətləri" QSC "Kürsəngi" və "Qarabağlı" quru yataqlarını işlədən "Salyan Oil" şirkəti ilə imzalanan müqaviləyə əsasən bu yataqların neft şlamından təmizlənməsini tamamilə başa çatdıracaq. Bu barədə QSC rəhbəri Sultan Əliyev bildirib.
"Artıq bu layihənin birinci mərhələsi başa çatıb, hazırda sonuncu mərhələ həyata keçirilir və dekabrın sonunadək təmizləmə işləri tamamilə başa çatdırılacaq", - Əliyev bildirib.
Layihənin birinci mərhələsində müqavilə sahələrində mexaniki rekultivasiya, ikinci mərhələsində isə yataqlarda bioloji rekultivasiyaların keçirilməsi nəzərdə tutulub.
Əliyevin qeyd etdiyi kimi, hazırda təxminən 40 min kubmetr neft şlamının bioremidasiyası aparılır.
Layihənin həyata keçirilməsinin əsas əhəmiyyəti bu sahələrin ekoloji vəziyyətinin yaxşılaşdırılması, QSC-nin yeni tərəfdaşları ilə əməkdaşlığın genişləndirilməsi və qlobal maliyyə böhranı şəraitində müəssisənin iqtisadi imkanlarının yaxşılaşdırılmasıdır.
"Salyan Oil" 2009-cu ildə işlənən yataqlarda dörd istismar quyusunun qazılmasını planlaşdırır.
Əliyevin də qeyd etdiyi kimi, bir ay ərzində Qobustanın istehsalat sahələrində 10 min kubmetr neft şlamının bioremidasiyası üzrə işlərə başlamaq planlaşdırılır. "İşlər "Gobustan Oil"-ın sifarişi ilə həyata keçiriləcək. Hazırda layihə tədbirləri həyata keçirilir, işlərə isə bir ay ərzində başlanılacaq", - Əliyev əlavə edib.
"Ekol Mühəndislik Xidmətləri" Qapalı Səhmdar Cəmiyyəti Azərbaycan Respublikası Dövlət Neft Şirkətinin (51%) və xarici investor "Lancer Services S.A." şirkətinin (49%) pay iştirakı ilə Abşeron yarımadasında ekoloji problemlərin həll edilməsi məqsədi ilə 2006-cı il martın 1-də təsis edilib. Bu barədə ARDNŞ-nin rəsmi internet saytında qeyd olunur.
Məqalə müəllifi ilə əlaqə ünvanı: [email protected]
