Qazaxıstan, Astana, 21 sentyabr / Trend , müxbir K.Konırova /
Avropaya qaz tədarükçüsü olan Norveçin StatoilHydro şirkəti Qazaxıstan hökuməti ilə Xəzər şelfinin Qazaxıstan hissəsinə daxil olmaq məqsədilə danışıqlar aparır, bu barədə jurnalistlərə bazar ertəsi Kazakhstan Energy Week-in birinci günü keçirilən kuluar söhbətlərdə StatoilHydro Kazakhstan-nın baş direktoru Odd Maqne İnsteford bildirib.
"Biz Qazaxıstan tərəfi ilə Xəzər şelfində bir sıra dəniz bloklarının istifadəsi üzrə danışıqlar aparırıq", - İnsteford bildirib. O, hansı bloklardan söhbət getdiyini bildirməyib.
Onun sözlərinə əsasən, Qazaxıstan hökuməti ilə danışıqlar qapalı rejimdə keçirilir.
"Buna görə də mən hansı dəniz bloklarında söhbət getdiyini deyə bilmərəm. Məlum olduğu kimi, biz əvvəl "Abay" blokuna maraq göstərirdik. Lakin ondan başqa şelfdə bir çox blok mövcuddur", - StatoilHydro Kazakhstan-ın rəhbəri bildirib.
