Azərbaycan, Bakı, 12 oktyabr / Trend , müxbir E.İsmayılov/
ARDNŞ-in ekologiya məsələləri üzrə vitse prezidenti Muxtar Babayevin bazar ertəsi verdiyi məlumata əsasən, şirkət aşağı təzyiqli qazın atmosferə atılmasının qarşısının alınması məqsədilə ilin sonunda "Günəşli-4" platformasında yeni kompressor stansiyasını istifadəyə verəcək.
"Həm texniki, həm də avadanlığın çatdırılması ilə əlaqədar çətinliklər var. Amma işlər gedir və mən düşünürəm ki, ilin sonunadək biz onları yekunlaşdıracağıq", - Babayev deyib.
O vurğulayıb ki, "Günəşli-4" platformasında quraşdırılacaq yeni kompressor stansiyası aşağı təzyiqli qazın atmosferə atılmasını 90 faizədək azaldacaq.
ARDNŞ "Günəşli" yatağının dayaz hissəsində aşağı təzyiqli qazın yığımını planlaşdırır. Sıxıldıqdan sonra bu qaz ya Azərbaycan qaz emalı zavoduna və ya milli qaz nəqli sisteminə göndərilərək abonentlərə veriləcək. Bu qazın nəqli üçün artıq quruda boru kəmərləri çəkilib.
Əvvəllər infrastrukturun olmaması səbəbindən bu qaz atmosferə atılırdı və ətraf mühitə böyük ziyan vururdu. İnfrastrukturun yaradılması və layihənin reallaşmasının 150 milyon dollara başa gələcəyi təxmin edilir.
Tullantıların illik həcmi 150-250 milyon kubmetr təşkil edir.
Məqalə müəllifi ilə əlaqə ünvanı: [email protected]