Azərbaycan, Bakı, 15 oktyabr / Trend , müxbir E.İsmayılov/
Azərbaycanın "Şah Dəniz" yatağında sutkalıq qaz hasilatı stabilləşdiriləcək və 20-22 milyon kubmetrə çatdırılacaq, ARDNŞ-nin birinci vitse-prezidenti Xoşbəxt Yusifzadə deyib.
Onun dediyinə görə, hazırda platformada olan dörd quyudan 17-18 milyon kubmetr qaz hasil olunur.
"Amma onlar (tərəfdaşlar) söz veriblər ki, yataqda hasilat stabilləşdiriləcək və sutkalıq qaz hasilatı 20-22 milyon kubmetrə çatdırılacaq", - o əlavə edib.
Yusifzadənin dediyinə görə, hazırda platformada dörd quyu işlək vəziyyətdədir. Beşinci quyuda isə təmir işlərilə əlaqədar olaraq hasilat aparılmır.
"Şahdəniz" yatağının işlənməsinə dair müqavilə 1996-cı il iyunun 4-də imzlanıb. Layihə iştirakçıları bunlardır: BP (operator) -25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO- 9 faiz, SOCAR - 10 faiz.