Azərbaycan, Bakı, 30 oktyabr / Trend /
ARDNŞ (Azərbaycan Respublikası Dövlət Neft Şirkəti) nanotexnologiyaların tətbiqi sahəsində Azərbaycan və Özbəkistanın müvafiq strukturları arasında ikitərəfli əməkdaşlıq təklifi ilə çıxış edib. Bu barədə təsisçisi ARDNŞ olan Ekol Muhendislik Xidmetleri QSC-nin (mühəndislik xidmətləri) məlumatında deyilir. Özbəkistan tərəfi təklif barədə öz razılığını verib.
Təklif ARDNŞ-nin vitse-prezidenti Muxtar Babayev tərəfindən Özbəkistana səfər çərçivəsi zamanı edilib. Özbəkistanda keçirilən bir sıra görüşlər zamanı, həmçinin QSC-nin müdiri Soltan Əliyev də iştirak edib.
Səfər çərçivəsində Azərbaycan nümayəndəliyi "Özbəkneftqaz" MHŞ-nin rəhbər şəxsləri ilə görüşlər keçirib. "Fərqanə" neft emalı zavoduna baş çəkən zaman Özbəkistan tərəfinə sənaye sularının və neft şlamının emalı sahəsində Ekol QSC-nin təcrübə və texniki imkanları, xidmətləri təklif edilib.
Danışıq və təkliflər paketini ümumiləşdirərək, tərəflər arasında əməkdaşlığın ümumi konsepsiyasını hazırlayan və təqdim edən işçi qrupunun yaradılması barədə qərar qəbul edilib.
