Azərbaycan, Bakı, 25 noyabr / Trend , müxbir N.İsmayılov/
Dekabrın 2-dən 9-dək Səmt qazının yandırılması həcminin azalması üzrə Qlobal Proqram (GGFR) çərçivəsində Dünya Bankının (DB) missiyası Bakıya gələcək. Bu barədə çərşənbə günü bankın Bakı nümayəndəliyindən deyilib.
Bakı missiyasının tərkibində bankın neft, qaz və mədənçıxarma xidmətləri üzrə departamentinin əməliyyat üzrə mütəxəssisi Bəxtiyar Kərimov və bankın məsləhətçisi Cozef Vaysman olacaq.
"Missiyanın səfərinin əsas məqsədi müzakirələr aparmaq və üç il müddətində GGFR-in üçüncü mərhələsi üzrə ARDNŞ ilə administrativ müqavilə imzalamaqdır", - DB nümayəndəliyindən bildirilib.
Bankın nümayəndəliyindən deyilib ki, missiya çərçivəsində layihələşdirmə və atılan qazın həcminin ölçülməsi məqsədi ilə ARDNŞ-nin və Neft Emalı zavodlarının rəhbərlikləri ilə müzakirələr aparmaq planlaşdırılır.
ARDNŞ 2008-ci ildən GGFR proqramının iştirakçısıdır. Şirkətdə Səmt qazının istifadəsi Planının (Associated Gas Recovery Plan - AGRP) hazırlanması üçün işçi qrupu yaradılıb. Planın qəbul olunması 2009-cu ilin sonuna kimi gözlənilir. ARDNŞ həmçinin qazın yandırılması həcmlərinin ölçülməsinin yerinə yetirilməsində proqramın dəstəyini istəyib.
Məqalə müəllifi ilə əlaqə ünvanı: [email protected]