Azərbaycan, Bakı, 12 dekabr / Trend , müxbir E.İsmayılov/
Gələn həftə Azərbaycanın xarici işlər nazirinin İrana səfəri çərçivəsində ARDNŞ və İran Milli Qaz Şirkəti arasında Azərbaycan qazının tədarükünə dair müqavilənin imzalanması gözlənilir. Bu barədə ARDNŞ prezidenti Rövnəq Abdullayev şənbə günü bildirib.
"Azərbaycan xarici işlər nazirinin İrana səfəri çərçivəsində İranla qazın uzun və qısamüddətli təminatı üzrə müqavilənin imzalanması gözlənilir", - Abdullayev deyib.
Onun sözlərinə görə, ilin əvvəlindən etibarən Azərbaycan qazının İrana ölkələr arasındakı mövcud infrastukturun imkan verdiyi həcmdə tədarük ediləcəyi planlaşdırılır.
Hazırda infrastruktur ildə 500 milyon kubmetrə yaxın qaz tədarük etməyə imkan verir. Gələcəkdə tərəflər qaz-kompressor stansiyalarının buraxılma qabiliyyətinin artırılması hesabına bunu genişləndirmək niyyətindədirlər.
Qazın qiyməti göstərilməyib.
Bir müddət əvvəl İranın Azərbaycandakı səfiri Məhəmməd Bağır Bəhrami demişdi ki, İran Azərbaycandan ildə 5 milyard kubmetrədək qaz əldə etmək niyyətindədir.
Azərbaycan qaz ixracı üzrə dörd istiqamətə malikdir - Türkiyə, Gürcüstan, Rusiya və İran. Hazırda Türkiyə və Gürcüstana qaz ixrac edilir. Gələn ilin əvvəlindən Azərbaycan qazının Rusiyaya ixracı başlayacaq.
Azərbaycan və İranı uzunluğu 1474,5 kilometr olan "Qazı Məhəmməd-Astara-Bind-Biand" qaz kəməri bağlayır. Onun buraxılış gücü ildə 10 milyard kubmetrdir. Bu marşrut 1971-ci ildə istismara verilən "Qazax-Astara-İran" boru kəmərinin qoludur. Onun yolunda üç kompressor stansiyası quraşdırılıb - Qazı Məhəmməd, Ağdaş və Qazaxda. Qaz-nəqliyyat sistemi 55 atmosfer təzyiqinə hesablanıb. Boru kəmərinin diametri 1200 millimetrdir.