Azərbaycan, Bakı 19 yanvar / Trend /
2009-cu ildə "Bakı-Tbilisi-Ceyhan" (BTC) boru kəməri vasitəsilə 38,2 milyon ton neft nəql edilib. 2008-ci ildə bu göstərici 32,8 milyon ton təşkil edib. Bu barədə Dövlət Statistika Komitəsindən məlumat verilib.
Keçən il BTC vasitəsilə "Tengiz" yatağından 1,9 milyon ton Qazaxsıtan nefti nəql edilib. 2008-ci ildə bu göstərici 285,1 min ton təşkil edib. Tengiz neftinin BTC vasitəsilə nəqlinə ötən ilin oktyabr ayında başlanıb.
BTC boru kəmərinin ümumi uzunluğu 1768 kilometrdir ki, bunun da 443 km-i Azərbaycan, 249 km-i Gürcüstan, 1076 km-i isə Türkiyə ərazisindən keçir. Boru kəmərinin inşasına 2003-cü ilin aprelində, neftlə doldurulmasına isə 2005-ci ilin mayında başlanılıb.
BTC Co-nun səhmdarları aşağıdakılardır: bp (30,1 faiz); AzBTC (25 faiz); Chevron (8,90 faiz); Statoil (8,71 faiz); ТРАО (6,53 faiz); Eni (5 faiz ); Total (5 faiz); Itochu (3,40 faiz ); Inpex (2,50 faiz); ConocoPhillips (2,50 faiz) və Amerada Hess (2,36 faiz).
2009-cu ildə Cənub Qafqaz qaz kəməri vasitəsilə (Bakı-Tbilisi-Ərzurum) 5,2 milyard kubmetr qaz nəql edilib. 2008-ci ildə isə bu göstərici 4,7 milyard təşkil edib.
"Bakı-Tbilisi-Ərzurum" boru kəmərinin uzunluğu 700 kilometrdir. Ötürmə gücü ildə 20 milyard kubmetr qazdan artıqdır. Bu qaz kəməri vasitəsilə Azərbaycanın "Şahdəniz" qaz-kondensat yatağından hasil edilən qaz nəql edilir. Qaz Gürcüstan və Türkiyəyə tədarük edilir. Azərbaycan da qazın alıcısı qismində çıxış edir.